Sábado, 21 de xullo.

Que panzada de quilómetros!!! Esta mañá acabamos de recoller a que foi a nosa casa durante estes seis días pasados. Pouco despois das 10 xa veu o paisano por alí para acabar de amañar contas e despedirnos.

Deste modo, dez minutos antes das 11 xa saiamos de Velikodolys´ke con dirección Kiev. Avanzamos a bo ritmo e a cada paso máis sorprendidos de que non nos parasen en ningún control policial... A verdade é que xa contabamos con perder tempo, paciencia e cartos con algún deses impresentables :(

Pero non, fomos avanzando ata que decidimos parar para cubrir parte das nosas necesidades a carón dun bonito lago cando xa levabamos 300 quilómetros percorridos.

Alí xantamos parte da comida que nos sobrara destes días: pan (de aquí porque o da casa hai tempo que o rematamos), nutela (porque a nocilla quedou en Madrid, no control de equipaxe), queixo, fiambre, un plátano e algunha que outra galletiña.

Cando marchabamos do entorno do lago fixemos unha parada moi especial pois vimos como unha tartaruga intentaba atravesar a estrada, tamén parou outro coche para axudala a cruzar cara ao lago. Que grande era!

Continuamos a viaxe e ás 18:00 estabamos en Kiev (Kyiv) circulando baixo unha intensa chuvia con 15ºC menos que no momento de saír do sur e intentando orientarnos para localizar o albergue no que estivemos a semana pasada. A ausencia de sinais púxonolo difícil unha vez máis pero desta decidimos coller un taxi que nos guiou directiños ao albergue por 50UAH (5€). Que ben!!! 

Descansamos un pedazo e saímos para ir cear, seguía a chover, no restaurante ao que xa fomos noutras ocasións e que nos resulta tremendamente acolledor con esas estanterías cheas de libros aínda que non entendamos nin papa do que poñen, e iso que xa imos entendendo algún que outro carácter cirílico ;)

Boas noites!!!